Plantun de Prouvènço

Pèr coumpara dos planto d'encò nostre

Lathyrus palustris & Euphorbia palustris

Lathyrus palustris

Fabaceae Leguminosae

Nom en français : Gesse des marais.

Descripcioun :
Aquelo jaisso, di proun raro, trachis dins li sagnasso e au mitan di cano mounte l'aigo rèsto proun. La cambo es un pau alado, li fueio caupon de 2 à 5 paréu de fuioun emé d'estipulo coume d'alabardo, lis enflourejado soun de grapo de 3 à 8 flour sus un pecou quàsi de la taio dóu fueioun proche. Li flour soun pourpro à vióuleto e pièi tiron sus lou blu. La dóusso èi negro un cop maduro.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai (acuei).

Port : Grando erbo
Taio : 20 à 100 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Lathyrus
Famiho : Fabaceae
Famiho classico : Leguminosae

Ordre : Fabales

Coulour de la flour : Vióuleto
Petalo : irreguliero
Ø (o loungour) flour : 1,5 à 2 cm
Flourido : Printèms - Estiéu

Sòu : Ca
Autour basso e auto : 0 à 800 m
Aparado : Vo
Abriéu à setèmbre

Liò : Palun - Coustiero
Estànci : Mesoumediterran
Couroulougi : Éurosiberiano
Ref. sc. : Lathyrus palustris L., 1753

Lachusclo(-de-palun)

Euphorbia palustris

Euphorbiaceae

Nom en français : Euphorbe des marais.

Descripcioun :
Grando laschusclo que pòu faire mai d'un mètre d'aut. Ei sènso péu, se recounèis majamen à si fueio e si ramo sènso flour (fotò). Si boursèu soun berrugous. Vèn dins li palun e proche de ribiero. Coumpara emé la lachusclo-d'Ilirìo que trachis dins li mémi relarg e ié sèmblo proun.

Usanço :
Coume tóuti lis meno d'Euphorbia, aquesto éufòrbi es uno planto empouisounanto. Lou la que s'escoulo à la coupo èi di proun irritant pèr la pèu, lis iue e la bouco. Pamens, poudès vous n'en servi pèr crema li berrugo.